(((( خلاص مسافر )))) للشاعر الكبير عادل الشهابي

عادل الشهابى

خلاص مسافر
سألونى مالك قولت خلاص مسافر ...
قالولى ليه ؟قولت كل شىء وله أخر ...
على الرحيل محدش يعمل شاطر ....
سفر ولابد منه فى يوم ....
حياه سهر ولازم ييجى النوم ...
حياه وعايشن فيها كل الوان الهموم ...
مسافر وتارك الأهل والأحباب ..
مسافر يا دنيا كنا عليكى أغراب ..
مسافر وهيتقفل عليا خلاص الباب ..
مسافر يا دنيا خلاص وسايبك ..
تعبت منك يا دنيا ومن عمايلك ...
أنا اللى كنت فى عينى وقلبى شايلك ..
لقيتك يا دنيا فى يوم زايله ..
مغروره وبتغرى زى الأمثال ما قايله ..
خلاص آن يا دنيا وقت الرحيل ...
شكرا يا دنيا ملحقتش أردلك الجميل ..
جيتك خفيف وطالع منك وحملى على كتافى تقيل ..
خلاص جت لحظه النهايه ...
سايبك يا دنيا والعمل هو اللى واخده معايا ..
رايح لحساب والواجب تاركه ورايا ...
آه يا دنيا آه وآه ...
من قلب أتغر بيكى والحزن واخده معاه ...
أصلك فيكى يا دنيا كتير محطات ..
فيه اللى مستعد لمحطته وفيه اللى فى متاهات ..
فيه اللى بيذكر نفسه وغيره مخيم عليه السكات ...
آه يا وجع ملى القلوب ...
ليه فيكى اللى نسى أن الموت قدر ومكتوب ..
يا عين أبكى بدل الدموع دم ...
بالآخره ليه مكنتش مهتم ...
عاوز أقول آه بعلوا صوتى ..
عاوز أقولها ومايمنعنيش عنها سكوتى ...
عاوز أقولها يا ناس أنا قبل موتى ...
سألونى مالك قولت خلاص مسافر ...
قالوا ليه قولت كل شىء وله أخر ...
بقلـــــم: عـــــادل الشـــــــهـــابى