فضفضة قلب صبى
،،،،،،،،،،،،،،،،،،،،،،،،،،،،
بعيش جوّه الحياه بإحساس الصبى
كل البراءه ف مذهبى
كل المشاعر جوّه مِنّى
زى نبتة صغيّره فى توب وليد
بترسم على الأرض فرحه
وايدين متشابكه بحلم جديد
طلّه على الشمس البعيده
بتناديها
لا تذهبى
لسّه جوّايه حكايات
متْعَشِتشْ فى كوكبى
عن طفل جوّايه اتسرق منه الزمن
واترمى جوّه المحن
عاش بالبراءه ف دنيته
وف سِكّته عاش زى يوسف فى المصير
كان يفتكر إن النهايه تبقى واحده
وان الطريق آخره حرير
لكن طريق الحلم مشواره مرير
صبرك يا صبر أصبح جوّه منى كتير
ايه يحمى طفل صغيّر من وحش الطريق ؟
إن عدّى بحر بيلتقى مليون مضيق
يا دنيا مفروشه بديابه ومصّاصين
كل السكك فيك رَدَى
طب أمشى فين ؟
حتى العينين معشّش جوّاها الفزع
بقى شئ دفين
يا طلّة الصبح النّديّه
فين زمان
أيام م كنت أبص لك
ألقى الحنان
وألقى السنابل زهزهت
جوّه الغيطان
وألقى القلوب جوّه البشر
حاسّه الأمان
طب ليه ما عاد فيه الأمان ؟
صوت الرصاص عالى
والغدر سيطر ع المكان
والكلمه صبحت خرسا
حتى لو قالها اللسان
والناس مهيش ناس
ولا حجر ولا جان
بقى شئ غريب ملوش كيان
يا صفحه ضايعه ف الورق
كان فيها فرحه من زمان
كل الحكايا بتنتهى
وبينكتب قبل النهايه
بحر عاصف م الهوان ،،،،،،،،
الشاعر / إبراهيم فهمى المحامى
15/9/2015
ليست هناك تعليقات:
إرسال تعليق