(((( هات أيدك يابنى ))) بقلم سلمى السيد

صمت الحنين

هات أيدك يابنى
ياابو كف لسة صغير
انا جدك اللى بشوف فيك عمرى
وياما اتحملت كتير
كل خط اترسم على ايدى
ليه معنى كبير
رسمه الزمن على وجهى وكفى
دليل على التغيير
انا كنت زمان زيك صغير
وبحلم بدنيا لابسة حرير
فيها زهور بتتفتح
وعلى الشجر واقفة العصافير
بتغنى مع صوت الناى
والموج بيرقص على ألحان الغدير
بس الزمن يابنى
كبرنى وحملنى كتير
وشوفت الدنيا على حقيقتها
وبدون تجميل
شوفت فيها ضحكات وأهات
وتلاقى وفراق
وناس عالهجرمش صابرين
وناس غدارة وناس محتارة
وناس فى الغربة عايشين بحنين
وناس شايلة من الهم كتير
وغرقانه فى التفكير
عاوزين يعيشوا عيشة هنية
بس الزمن عليهم بخيل
وفيها ناس مستقوية
على الغلبان أبو حظ قليل
بس يابنى فى شىء لسة جميل
فى بسمتك ولمسة ايدك
اللى لسة ناعمة زى الحرير
وفى أمل معاك بيكبر
يمكن تقدر عالتغير
وترسم بكرة فى اجمل صورة
بتوب اخضر وطرحة حرير
اصل الأمل لو مات يابنى
عمرنا ما هنسعى للتعمير

بقلم سلمى السيد