الرّاعي الصغير
أنا راعي صغير و سارح بمعزاتي
طامع بمنتوج نقد بيه حياتي
نقطّع سلاسل فقرنا و نروح
نفرّح قلوب امّيمتي و اخواتي
جبل المغيلة سلكت و الطريق صعيب
ومعايْ كلب ْو نايْ و فطور في جراباتي
ظنّيت فيه الخير و الأمان
كيف سالف الأيام من مدّتي و عاداتي
طلعت وحوش الشر ترمق فيّ
بسيوفهم تهبْري ذبّحوا معيزاتي
جاش خاطري و شعلت نيران قوية
و كالفارس الصنديد عطيتهم كلماتي :
هي كل ما عندي و عدّتي وارزاقي
كفّوا الذّبيح عليها وارحموا آهاتي
كشّروا الأنياب و كثير ضحكوا عليّ
و قرّطوا الرجلين و قالوا انت الآتي
جزّروا لي راسي بعثوه لمّي هدية
فْي ساشي مع بن عمي تينوْحوا جاراتي
حطّوه في الثلّاجة خرجوا اليوم عشية
تيدوّروا عالجثّة و الكلب يحرس ذاتي
الله يصبّرك يا امّيمتي على مبروك الغالي
وابّيْ يا سلطاني يا رافق بحالاتي
هكّة القضاء حكم بفراق ماهو بيدي
جالت ذئاب الشر بدروبنا و غاباتي
ابكوا على اللي صار و سيّلوا الدمعات
وترفّقوا يا قوم بكليْبي و معزاتي
ليست هناك تعليقات:
إرسال تعليق