الام لولو
يا مشرط الجراح
جنبي اليمين وإلا الشمال
يا مشرط الجراح نويت
آسفة على هذا السؤال
مش خايفة أموت
خايفة إن حييت
راح أموت أنا على كل حال
يمكن أكون بيك انتهيت
افتح شوية شمال كده
قلبي ضلوعه مضعضعة
اقلع جدور شجرة غرام
مغروسة فيه ومفرّعة
يمكن يخف من الآلام
دانا م الغرام متوجّعة
اطرح حياتي م العذاب
وان فاض لي باقي اجمعه
على ذكرى حلوة من الشباب
ف العمر لسّه مسمّعة
يمكن تداوي قلب داب
م الحب عينه مدمّعة
يا مشرط الجراح خلاص
الروح أهي طارت هناك
اتاريني بحيا بالغرام
وأمّا نزعته قلبي مات
روحي يا طايرة مرفرفة
سابقة حدود المعرفة
مشتاقة للزمن اللي فات
وألا سعيد ة بالصفا
فايته وراكي الذكريات
وفراغ ف أحضان الدفا
وقلوب ملانة بالآهات
وعقول تتوه ف الفلسفة
مش باقي منك غير كلام
مكتوب على شوية ورق
لو تقروا على روحي السلام
تلقوا كلامي بنور شرق
وتحية مني ف الختام
وسبّحوا معبود خلق
..
الام لولو ( نجلاء عزت)
..
الام لولو ( نجلاء عزت)
ليست هناك تعليقات:
إرسال تعليق